Ayni vaqtda Samarqand shahrida “Inson huquqlari sohasida ta’lim” Global forumining dastlabki ish kuni o‘z ishini boshladi. Unda BMT Bosh Assambleyasining 76-sessiyasi va Inson huquqlari kengashining 46-sessiyasida ilgari surilgan tashabbus asosida inson huquqlari sohasida ta’limni rivojlantirish muammolari muhokama qilinmoqda.
Mazkur tadbirda Inson huquqlari bo‘yicha O‘zbekiston Respublikasi Milliy markazi direktori Akmal Saidov, BMT va boshqa xalqaro, mintaqaviy va xorijiy tashkilotlar vakillari, 30 dan ortiq davlatlarning inson huquqlari bo‘yicha yetakchi ekspertlari, professor-mutaxassislari ishtirok etishmoqda.
Forumda O‘zbekiston Respublikasi Xalq ta’limi vaziri o‘rinbosari Vahobjon Rajapov so‘zga chiqib, bola huquqlari sohasida Xalq ta’limi vazirligi tizimida amalga oshirilayotgan ishlar haqida atroflicha ma’lumot berdi.
Ta’kidlanganidek, hozirda mamlakatimiz umumta’lim maktablarida ta’lim 7 ta tilda, (o‘zbek, rus, qoraqalpoq, tojik, qirg‘iz, qozoq, turkman) olib boriladi. Maktab o‘quvchilari uchun darsliklar ham 7 tilda chop etiladi.
Umumta’lim maktablarining 8-, 10-, 11-sinflarida “O‘zbekiston davlati va huquqi”, 9-sinfda “Konstitutsiyaviy-huquq asoslari” fanlari o‘qitilmoqda. 1-4-sinflarda "Konstitutsiya alifbosi” kursi, 5-6-7-sinflarda “Konstitutsiya olamiga sayohat” kursi tegishli fanlar tarkibidagi mavzularga singdirilgan holda o‘qitib kelinmoqda.
Alohida ta’lim ehtiyojlari bo‘lgan bolalar uchun mavjud 90 ta ixtisoslashtirilgan maktab va maktab-internatlarida ayni vaqtda nogironligi bo‘lgan 23 779 nafar bola ta’lim olmoqda.
2021/2022-o‘quv yilida respublikada ilk marotaba tajriba sifatida hududlarning markazidagi shaharlarda va Toshkent shahrining tumanlarida bittadan umumta’lim maktablarida (jami 35 ta) inklyuziv ta’lim tizimi joriy etildi va unda 122 nafar bolalar ta’lim olishi ta’minlandi. 2022-2023 o‘quv yilida 334 nafar o‘quvchi 116 ta inklyuziv maktab ta’limiga qamrab olindi.
Qayd etilganidek, 2025-yilga borib O‘zbekistonda inklyuziv ta’lim tizimi joriy qilingan umumiy o‘rta ta’lim muassasalari ulushi jami maktablarning 51 foiziga, inklyuziv ta’lim shartlarida ta’lim olayotgan alohida ta’lim ehtiyojlari bo‘lgan bolalar ulushi 40 foizga yetkazilishi rejalashtirilgan.
Tadbir davomida vazir o‘rinbosari Vahobjon Rajapov bolalar huquqlari hamda ularning sifatli ta’lim olishlari, ijtimoiy himoyasini ta’minlash borasida yurtimizda olib borilayotgan boshqa jarayonlarga doir muhim jihatlarga alohida to‘xtalib o‘tildi.
Forum tadbirlari joriy yil 6-dekabrga qadar davom etadi.
