Poytaxtimizdagi 52-sonli alohida ta’lim ehtiyojlari bo‘lgan bolalar uchun ixtisoslashtirilgan maktab o‘quvchilari yaratgan mahsulotlar ana shunday nomlanadi.
![](/uploads/content/eeeww9jpa7Lv58z7OC4ncybjdGHnS89h.jpg)
Imkoniyati cheklangan insonlarga g‘amxo‘rlik qilish va ularga mehr-oqibat ko‘rsatish xalqimizga xos bo‘lgan ezgu odatlardan biri. Shunga hamohang ravishda davlatimiz tomonidan bugungi kunda alohida ta’limga ehtiyoji bo‘lgan bolalarning har tomonlama munosib tahsil olishlari uchun barcha shart-sharoitlar yaratib berilmoqda.
![](/uploads/content/S3uttx6ALGuWIulbsgUyEWHRuv4m7AzT.jpg)
Poytaxtimizning Yashnobod tumanida joylashgan 52-sonli alohida ta’lim ehtiyojlari bo‘lgan bolalar uchun ixtisoslashtirilgan maktabda hozirda mazkur g‘amxo‘rlikni yurakdan his qilib yashayotgan 198 nafar o‘quvchi tahsil olib kelmoqda.
![](/uploads/content/9fHMMIG6QTD95mLebfE6ZW0STNAos6X-.jpg)
“3-dekabr — Xalqaro nogironlar kuni” munosabati bilan ushbu ta’lim dargohida bugun o‘tkazilgan “Ochiq eshiklar kuni” tadbirlari bu yerdagi bolajonlarning chinakam ma’nodagi bayramiga aylanib ketdi.
![](/uploads/content/lC72k643p_FTN2s9KIFPeepjzoBX58hX.jpg)
Tadbir avvalida maktab o‘quvchilari tomonidan tayyorlangan turli ko‘rinishdagi mahsulotlar ko‘rgazmasi tashkil etildi. Unda qo‘l mehnati yordamida yaratilgan uy-ro‘zg‘or buyumlari, tikuvchilik va kashtado‘zlik mahsulotlari, bolalar va kattalar uchun turli ko‘rinishdagi kiyim bezaklari namoyishi ishtirokchilarda katta taassurot qoldirdi.
![](/uploads/content/cBjb6p3E-giEKuBKBUJ-R0C-OLvTgWEW.jpg)
“Bolalar mehri bilan yaratilgan” yorlig‘i tushirilgan mazkur mahsulotlarda chinakam ma’noda bolajonlarning katta mehnati va mehri aks etib turibdi.
![](/uploads/content/Mv9aALCa5xZsRYy7neLfqq1TJgywS6gL.jpg)
— Maktabimizda 23 ta sinfxona mavjud bo‘lib, ularning 2 tasi ijtimoiy-maishiy va tikuvchilik yo‘nalishlariga moslashtirilgan. U yerda qizlarimiz turli ko‘rinishdagi kiyim-kechak, uy-ro‘zg‘or uchun zarur buyumlar hamda pishiriqlar tayyorlashadi”, — deydi maktab direktori Muqaddas Nurmuhammedova. — Shuningdek, maktabimizdagi 2 ta duradgorlik va 2 ta chilangarlik xonalarida o‘g‘il bolalar xo‘jalik ishlari va dehqonchilik uchun zarur ish qurollarini ustozlari yordamida yaratishadi.
![](/uploads/content/ninbl_DTn-EwxxUUhJx1tc3FRBDw3NpV.jpg)
Bayram dasturi davomida Xalq ta’limi vazirligi, Oliy Majlis Qonunchilik palatasi, davlat va jamoat tashkilotlari vakillari, mahalla faollari hamda ota-onalar so‘zga chiqishib, o‘quvchilarga o‘z tilaklarini bildirib o‘tdi. Shuningdek, homiylar tomonidan bolajonlar uchun qishgi kiyimlar, nogironlik aravachalari hamda turli esdalik sovg‘alari taqdim etildi.
![](/uploads/content/kcJjtY7J5LBTm2HR4U_0D5GkrDPnfEbp.jpg)
Tadbir so‘nggida maktab o‘quvchilari tomonidan tayyorlangan kuy-qo‘shiq va sahnalashtirilgan teatr dasturlar namoyishi bo‘lib o‘tdi.
![](/uploads/content/POea_MwJd4K7GWs5mnxoccVK0qaZMYUa.jpg)