Joriy yilning 12-may kuni O‘zbekiston Respublikasi Maktabgacha va maktab ta’limi vazirligi, Ta’lim bo‘yicha global hamkorlik (GPE) tashkiloti, UNICEF hamda milliy va xalqaro hamkor tashkilotlar ishtirokidagi “Mahalliy ta’limi guruhi”ning navbatdagi uchrashuvi bo‘lib o‘tdi.
![](/uploads/content/pAH4Afc297hF4dwdBvocNXCwzucomaqP.jpg)
Unda GPE tashkilotining Mustaqil texnik maslahat kengashi (ITAP) tomonidan “2023-2026-yillarga mo‘ljallangan O‘zbekiston Respublikasi ta’lim sohasini isloh qilishning Milliy yo‘l xaritasi” (National Compact)da belgilangan vazifalar ijrosi, shuningdek, Islom taraqqiyot banki (ITB)ning texnik jamoasi tomonidan tayyorlangan ITB-GPE loyihasining birlamchi konsepsiyasi haqida muhim fikr va mulohazalar bildirib o‘tildi.
![](/uploads/content/NEHnab3YtGD-inKMStmcOfPxAS90Gpqr.jpg)
Aytish lozimki, yuqorida keltirib o‘tilgan “Milliy yo‘l xaritasi” (National Compact) hujjati ta’lim tizimini rivojlantirishning ustuvor yo‘nalishlarini va ularni amalga oshirish chora-tadbirlarini belgilaydi. Mazkur hujjat 5 oy davomida xalqaro va mahalliy ta’lim ekspertlari tomonidan yaratilgan bo‘lib, 2023-yilning 5-aprel kuni “Mahalliy ta’lim guruhi” a’zolari tomonidan tasdiqlangan hamda Ta’lim bo‘yicha global hamkorlik (GPE) tashkilotiga ko‘rib chiqish uchun yuborilgan edi.
![](/uploads/content/j6u9wYHzWneL4E3p6ePpsJg2sPgvHJIL.jpg)
Mazkur uchrashuv davomida Maktabgacha va maktab ta’limi vazirligi tomonidan GPE tashkilotining tizimli islohotlarni qo‘llab-quvvatlashda inson resurslarini rivojlantirishga qaratilgan “System Capacity Grant” dasturiga xalqaro moliyaviy institutlar bilan birgalikda ariza berishga doir e’lon berildi.
![](/uploads/content/Tw_kwTjkb2nDTrREP6f4J7KtqJMRDIVV.jpg)
Tadbir so‘nggida “Mahalliy ta’lim guruhi” a’zolari 2023-2026-yillarga mo‘ljallangan “Milliy yo‘l xaritasi”da belgilangan ustuvor vazifalarni bajarishga doir hamkorlikni yanada kengaytirish bo‘yicha o‘zaro kelishuvga erishishdi.
![](/uploads/content/juXxvG3kbcnmyyCjQWoclDMSQg121wlo.jpg)
![](/uploads/content/sXS8rc6MAQhDMtIPkqVntnyiFS1NYbTt.jpg)