Mazkur dastur asosida fan o‘qituvchilari 2021 yilning 4-9 yanvar kunlari davomida o‘zi faoliyat ko‘rsatayotgan maktablarda o‘zining kasbiy mahoratini oshirish uchun quyidagi ishlar bilan shug‘ullanishlari tavsiya etiladi:

✅ ish tajribasi ommalashgan, izlanuvchan, tashabbuskor va ijodkor o‘qituvchilarning zamonaviy dars o‘tish usullari bilan tanishadi, iqtidorli va o‘zlashtirishi qiyin bo‘lgan o‘quvchilar bilan ishlash usullarini ustoz-shogird an’analariga muvofiq tajribali ustozlardan o‘rganadi;

✅ malaka oshirish kursida o‘rgangan yangiliklarini o‘quv jarayonida qo‘llash, murakkab mavzularni osonroq tushuntirish yo‘llari, fanga oid turli xil didaktik qurollarni ishlab chiqishni boshqa fan o‘qituvchilar bilan muhokama qiladi;

✅ chet tili (ingliz tili)ni o‘rganish bo‘yicha xorijlik mutaxassislar tomonidan tayyorlangan elementar bosqich (basic English) bo‘yicha darslarni tomosha qilib, chet tillar bo‘yicha savodxonligini oshiradi;

✅ o‘z fani yo‘nalishi bo‘yicha o‘quv rejalar, dasturlar, darsliklardagi o‘zgarishlarni o‘rganib chiqadi, tizimga doir me’yoriy, metodik hujjatlar va ulardagi imtiyozlar bilan tanishadi;

✅ «Kundalik» elektron jurnal va elektron kundalik tizimi bilan tanishish maqsadida «Kundalik» jamoasi tomonidan tayyorlangan roliklarni, xalqaro tadqiqotlar (PISA, PIRLS, TIMSS) bo‘yicha darslar, «Ta’lim texnologiyasi», «Tarbiya» fani bo‘yicha videodarslarni tomosha qiladi;

✅ ta’limga oid onlayn-resurslarda yangilik va videodarslar bilan tanishadi, o‘z fani bo‘yicha qo‘shimcha ma’lumotlar to‘playdi, zamonaviy pedagogik texnologiyalar, o‘qitish metodlarini izlab topadi.

✅ 2020-2021 o‘quv yilining 3-choragi davomida taqvim-mavzu rejalari asosida o‘tadigan darslariga tayyorgarlik ko‘radi, mavzularga oid qo‘shimcha materiallar to‘playdi, taqdimotlar tayyorlaydi.