Mamlakatimizda 2017-yil 3-yanvarda “Korrupssiyaga qarshi kurashish to‘g‘risida”gi O‘zbekiston Respublikasi Qonuni hamda O‘zbekiston Respublikasi Prezidentimizning 2025-yil 21- apreldagi “Korrupsiyaga qarshi kurashish tizimini yanada takomillashtirish bo‘yicha belgilangan ustuvor vazifalar ijrosini samarali tashkil etishga doir chora-tadbirlar to‘g‘risida”gi Farmoniga asosan, bugun mamlakatimizdagi barcha sohalarda korrupsiyaga qarshi kurashish va uning oldini olish borasida tizimli islohotlar amalga oshirilmoqda.
Jumladan, Maktabgacha va maktab ta’limi vazirligi tomonidan ham korrupsiyaviy xavf-xatarlarni aniqlash va tizimli tahlil qilish, ularni keltirib chiqaruvchi omillarni bartaraf qilish hamda qonunbuzarlik holatlari yuqori bo‘lgan hududlarda “Korrupsiyatsiz soha” va “Korrupsiyasiz hudud” kabi loyihalar ishlab chiqildi.
Mazkur loyihalar doirasida bugun Toshkent viloyati Maktabgacha va maktab ta’limi boshqarmasida boshqarma apparati xodimlari va tuman, shahar bo‘limi boshliqlari, ta’lim muassasalari rahbarlari ishtirokida yig‘ilish bo‘lib o‘tdi.
Yig‘ilishda Maktabgacha va maktab ta’limi vazirligi Korrupsiyaga qarshi kurashish va huquqiy nazorat boshqarmasi boshlig‘i Shaxobiddin Jo‘raboyev so‘zga chiqib, bugungi kunda tizimda korrupsiyaga qarshi kurashish va uning oldini olish borasida olib borilayotgan islohotlar haqida gapirdi.
Yig‘ilishda pora olish, pora berish va o‘zlashtirish korrupsiyaviy jinoyatlar orasidagi eng og‘ir va ijtimoiy xavfliligi yuqori bo‘lgan jinoyatlardan biri ekanligi qayd etildi.
Endilikda maktabgacha va maktab ta’limi sohasida korrupsiyaga qarshi kurashishni yanada kuchaytirish, bunda “noqonuniy boylik orttirish”, “uchinchi shaxslarning moddiy manfaatlarini ko‘zlab ta’magirlik qilish” kabi harakatlarga chek qo‘yish, faoliyatning ochiqligini ta’minlash, xodimlarning korrupsiyaga qo‘l urmasligi uchun ularning huquqlarini buzilishiga yo‘l qo‘ymaslik borasida mas’ullarga tegishli tavsiya va topshiriqlar berildi.
Shuningdek, yig‘ilishda tashkiliy masala ham ko‘rib chiqilib, Maktabgacha va maktab ta’limi vazirining tegishli buyrug‘iga asosan, viloyat Maktabgacha va maktab ta’limi boshqarmasining korrursiyaga qarshi kurashish va huquqiy nazorat sho‘basi vazifasiga Ermatov Akrom Bo‘ribayevich tayinlandi va jamoaga tanishtirildi.
