Obiljon bolaligidan tarixga qiziqardi, tarixchi pedagoglarga havas qilardi. Orzusiga yetgach, yangi marra tomon -shu sohaning ilg`ori bo`lishga intildi. Uning bu niyati o`ttiz uch yoshida ro`yobini topdi. Avvaliga u Namangan shahar huquq fani o`qituvchilari o`rtasida, keyin esa viloyatdagi bellashuvda g`olib chiqdi. Minglab pedagoglar orasidan saralab olingan o`n to`rt nafar fan o`qituvchisi Xorazmda respublika bosqichida g`oliblik uchun o`zaro bilimlarini sinadilar.

Namaganlik yosh pedagogning muammoli, an'anaviy dars o`tish, kompyuter savodxonligi, sahna darslariyu falsafa, ixtiro himoyasi bo`yicha har bir chiqishi, test savollariga bergan aniq javoblarini nufuzli hay'at a'zolari yuqori baholadi. Uning tarix, huquq va burch mavzularidagi qarashlari ko`pchilik e'tiborini tortdi.

"Ko`hna tarix qanchadan-qancha bosqinlarni, alg`ov-dalg`ovlarni boshdan kechirdi. Mo`g`ul bosqinchilariga qarshi Jaloliddin Manguberdi boshchiligidagi xalq kurashi hech qachon unutilmaydi. Sohibqiron Amir Temur yagona qudratli davlat barpo etish uchun butun hayotini bag`ishladi. Boburmirzo shoh bo`lib, o`z Vatani tuprog`ini qo`msab o`tdi. Ana shu buyuk inson kindik qoni to`kilgan Andijon viloyati zaminida bundan bir yil oldin ro`y bergan xunrezlik hamon qalbimizni larzaga soladi. Bir guruh nonko`rlar o`z vatandoshlariga qurol ko`tardilar. Minglab begunoh insonlarning qoni to`kildi, "Akromiylar" deb nomlanmish bu kazzoblar tarix oldida albatta javob beradilar". Vodiylik bu yigitning teran fikrlarga boy nutqida huquq va burch tushunchasi alohida bo`rtib turgani bois, tanlov ishtirokchilari e'tiborini tortdi. "Mamlakatimiz o`z mustaqilligiga erishgan kundan boshlab qadriyatlar tiklandi. Millatidan qat'i nazar, har bir kishi diniy marosimlarda ishtirok etish imkoniyatiga ega bo`ldi. Bu o`zbekiston Bosh qomusida qonun yo`li bilan mustahkamlab qo`yildi. Afsuski, ana shunday ne'mat qadriga etmagan kimsalar ham topildi. o`z huquqini yaxshi bilgan, ammo burchini unutgan, islom dinini qurol qilib olib, xalifalikni tiklamoqchi bo`lgan bunday kimsalarga eng og`ir jazo xalq nafrati hukmidir. Yurtboshimiz ta'kidlaganidek, o`zbek xalqi hech kimdan kam emas, kam bo`lmaydi ham. Uning osoyishta hayotiga rahna solmoqchi bo`lganlar xalq g`azabiga uchraydilar. Ona tuproqqa zor bo`lib o`tadilar..." Falsafiy mag`zi to`q fikrlar ko`rik-tanlov ishtirokchilarining o`y-fikrlari bilan hamohangligidanmi, bellashuvda raqib hisoblangan hamkasblari tomonidan ham alohida kutib olindi. Barcha shartlar

bo`yicha ballar jamlanganda 80,8 ball to`plagan Obiljon Xoliqov g`olib deb topildi.

Obiljon Namangan viloyatining Namangan tumani, Past qiyot qishlog`ida tavallud topgan. Tumandagi 23-umumta'lim maktabida o`qib yurgan kezlarida boshlang`ich ta'lim ustasi Mavludaxon Tojiboeva, fan o`qituvchilari g`aniyaxon Yunusova, g`anijon o`rinov, Zulfiyaxon qo`chqorova, Mahmudjon Sharipovlar uning qalbida o`qituvchilik kasbiga bo`lgan qiziqishni alangalatdilar. Ayniqsa, yuqorida ta'kidlaganimizdek, tarix fani uning uchun g`oyatda aziz edi. Tarixiy asarlarni ko`proq mutolaa qilganidanmi yoki yuqorida nomlari zikr etilgan ustozlar sababmi, hujjatlarini hech ikkilanmay Namangan davlat universitetining tarix fakultetiga topshirdi. Besh yil ham ortda qoldi. o`zi o`qigan maktabda ish boshlaganiga ham mana, qariyb o`n yil bo`ldi. Birinchi yiliyoq u o`zining izlanuvchan va talabchanligini namoyish eta bildi. Tarix va huquqshunoslik fanlaridan darslarni noan'anaviy tarzda o`tib, ustozlari ishonchini qozondi. qator yillardan buyon o`quvchilari tuman va viloyat miqyosidagi fan olimpiadalarida faol ishtirok etib, faxrli o`rinlarni olib kelishyapti.

Obiljondagi tashkilotchilik qobiliyati haqida alohida to`xtalib o`tish joiz. 1998 yildan buyon u O`zbekiston Konstitusiyasini targ`ib qilish, yoshlar o`rtasida jinoyatchilik va huquqbuzarliklarning oldini olish maqsadida "Siz qonunni bilasizmi?" ko`rik-tanlovini o`tkazib kelmoqda. U tayyorlangan "Adolat" va "qalqon" guruhlari viloyatda birinchi o`rinni egallab, respublika bosqichida yuqori natijalarga erishdi. 2004-2005 o`quv yilida viloyat prokuraturasi, viloyat xalq ta'limi va sog`liqni

saqlash boshqarmalari, "Kamolot" YOIH viloyat kengashi bilan hamkorlikda o`tkazilgan "huquqiy madaniyat - buyuk kelajak asosi" ko`rik-tanlovida "qalqon" guruhi "Eng navqiron guruh" yo`nalishi bo`yicha g`olib deb topildi.

Hikoyamiz qahramoni maktabda yoshlarga puxta bilim berish uchun tinmay izlanadi. Gazeta-jurnallar, internet axborotlarini muntazam kuzatib boradi. Shu bilan birga o`zi ham maqolalar yozadi, she'rlar mashq qiladi. "Amir Temur - buyuk e'tiqod va iymon sohibi", "Konstitusiya - huquqiy davlat poydevori", "Siz bayroqni bilasizmi?", "Daxldorlik hissi" kabi mavzularda yozgan ilmiy-siyosiy maqolalari tuman, viloyat va respublika gazetalarida chop etilgan. Ko`plab dars ishlanmalari esa ommalashtirishga tavsiya etilgan.

- O`zbekiston orzular amalga oshadigan buyuk mamlakat, - deydi Obiljon Xoliqov. - Bugun men ishlayotgan maktabda 1200 nafardan ziyod o`g`il-qiz tahsil olayapti. Ularning puxta bilim olishlari uchun barcha shart-sharoit yaratilgan. Maktab ta'limini rivojlantirish davlat umummilliy dasturi tumanimizda ham izchil hayotga tatbiq etilmoqda. Bu xayrli harakatda maktabning 60 nafar pedagoglari faol qatnashmoqda. Men ham ular safida ekanimdan faxrlanaman.